ᑐᕋᐃᓯ ᕚᓚᔅ
ᐃᒃᓯᕙᐅᑕᖅ
ᑲᖏᖅᖠᓂᖅ
ᒥᔅ ᕗᐊᓚᔅ ᑲᑎᒪᔨᐅᖃᑕᐅᓯᒪᓕᖅᑐᖅ 2016−ᒥᓂᑦ ᒫᓐᓇᐅᔪᖅ ᐃᒃᓯᕙᖃᑕᐅᔭᕆᐅᖅᑐᖅ ᑲᑎᒪᔨᐅᓂᕐᒧᑦ. ᑎᑎᕋᖅᑎ−ᑮᓇᐅᔭᓕᕆᔨᐅᓯᒪᓕᕐᒥᔪᖅ ᐊᑐᖅᑐᐊᕐᕕᒃᑯᑦᑯᐊᐳᕇᓴᖓᓂ.
ᒥᔅ ᕗᐊᓚᔅ ᐱᓕᕆᖃᑦᑕᖅᓯᒪᓂᑰᔪᖅ ᐱᓇᓱᐊᕐᕕᖕᒥ ᖃᐅᔨᒪᔨᒋᔭᐅᓪᓗᓂ ᐊᒻᒪᓗ ᑮᓇᐅᔭᓕᕆᓂᕐᒥᒃ ᐱᔨᑦᑎᕋᖅᑎᐅᖃᑦᑕᖅᓯᒪᒋᓪᓗᓂ. ᖃᐅᔨᒪᓂᖃᕐᓂᓂ ᓇᒃᓴᖅᐸᐅᒃ ᑮᓇᐅᔭᓕᐅᕋᓱᐊᖅᑎᐅᓐᖏᑦᑐᖅ ᑲᑐᔾᔨᖃᑎᒌᓄᑦ ᐊᒻᒪᑦᑕᐅᖅ ᐋᔩᖅᑎᐅᖃᑦᑕᖅᓯᒪᒋᓪᓗᓂ, ᐸᕐᓇᐃᔨᐅᓪᓗᓂ ᑎᒥᐅᔪᒧᑦ, ᖃᐅᔨᒪᔨᑕᕆᔭᐅᓪᓗᓂ ᐃᑲᔪᖅᑎᐅᓯᓐᓈᑦ, ᐊᒻᒪᓗ ᐱᓕᕆᖃᑎᒌᓂᒃ ᓴᙱᒃᑎᓴᐃᕙᒃᑭᓪᓗᓂ.
ᐃᓕᓴᕆᔭᐅᔾᔪᑎᖃᕆᕗᖅ ᐃᓕᓐᓂᐊᖅᓯᒪᓂᕐᒧᑦ ᐱᓇᓱᐊᕐᕕᖕᒥ ᑎᑎᕋᖅᑎᐅᓂᕐᒧᑦ ᐱᓕᕆᐊᕆᓪᓗᐊᑕᕐᓂᑰᓪᓗᓂᐅᒃ ᓂᐅᕐᕈᑎᖃᕐᓂᖅ/ᒪᓂᓴᐅᑎᓕᐅᕐᓂᖅ ᑕᐃᑲᓂ ᕋᑦ ᑎᐅ ᓯᓚᑦᑐᖅᓴᕐᕕᐊᓂ. ᒥᔅ ᕗᐊᓚᔅ ᐃᓕᓴᕆᔭᐅᔾᔪᑎᖓ ᐱᓇᓱᐊᕐᕕᖕᓄᑦ ᑎᑎᕋᖅᑎᐅᓂᕐᒧᑦ ᓱᓕᑦᑕᐅᖅ ᖃᐅᔨᒪᓂᖃᕈᑎᒋᕙᐅᒃ ᐊᐅᓚᑦᑎᔨᐅᓂᕐᒥᒃ ᑐᓴᐅᒪᖃᑦᑕᐅᑎᓕᕆᓂᕐᒥᒡᓗ.
ᒥᔅ ᕗᐊᓚᔅ ᐃᓕᓐᓂᐊᖅᓯᒪᖕᒥᔪᖅᑕᐅᖅ ᑐᖅᑯᐃᓂᕐᒥᒃ ᐊᑐᖅᑐᒃᓴᒫᓄᑦ ᐊᒻᒪ ᐊᑦᑕᕐᓇᖅᑐᒦᑦᑕᐃᓕᓂᕐᒥᒃ ᑲᓇᑕᒥ ᑮᓇᐅᔭᖃᕐᕕᖏᓐᓂ ᐊᒻᒪ ᐊᓂᒍᐃᓯᒪᒋᓪᓗᓂ ᐃᓕᓐᓂᐊᕐᓂᒃᑯᑦ ᓄᓇᕗᑦ ᓯᕗᓂᒃᓴᕗᑦᐃᓕᓐᓂᐊᒐᖓᓂᒃ.
ᒥᔅ ᕗᐊᓚᔅ ᒫᓐᓇᐅᔪᖅ ᐃᖅᑲᓇᐃᔭᖅᑐᖅ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᖓᓐᓄᑦ ᑲᖏᖅᖠᓂᕐᒥ ᐊᒻᒪᓗᑕᐅᖅ ᓄᓇᕗᑦ ᒐᕙᒪᒃᑯᖏᓐᓄᑦ ᐊᔾᔨᒌᖏᑦᑐᓄᑦ ᐱᓕᕆᕝᕕᖕᓃᖃᑦᑕᖅᓯᒪᖕᒥᔪᖅ. ᐊᖓᔪᖅᑳᖑᓪᓗᓂ ᐊᐅᓚᑦᑎᔨᐅᓚᐅᕐᒥᔪᖅ ᐊᑐᖅᑐᐊᕐᕕᒃᑯᐊᐳᕋᐃᓴᓐᑯᓐᓄᑦ ᐊᒻᒪᓗ ᓄᓇᕗᑦ ᓯᕗᓂᒃᓴᕗᒻᒥ ᑎᑎᕋᖅᑎᓄᑦ ᐃᓱᒪᑕᕆᔭᐅᓚᐅᕆᓪᓗᓂ.
ᒥᔅ ᕗᐊᓚᔅ ᐃᓕᓴᕆᔭᐅᔾᔪᓯᐊᖅᓯᒪᔪᖅ ᒪᒃᑯᒃᑐᓂ ᐱᓇᓱᐊᕐᕕᖃᖅᑐᓂ ᐃᓕᓴᕆᔭᐅᔾᔪᑎᒥᒃ ᑕᐃᑲᖓᑦ ᐱᓇᓱᐊᖅᑏᑦ ᐱᕈᖅᓰᔨᖏᑦ ᑲᓇᑕᐅᑉ ᑮᓇᐅᔭᖃᕐᕕᖓᓂᑦ.
